2014-02-05لیکوال: عزت الله پیمان بـــــرخه: نوري تازه پیښې كـــتني: 28

د يوه نوي راپور له مخي د افغان امنيتي عسکرو تلفات ډېر سوي دي. د ۲۰۱۳کال په لومړيو يوولسو مياشتو کي تلفات چي مخکي ۴۶۰۰ وو ؛ دوه برابره سوي دي.

رويټرز خبري آژانس د دوشنبې په ورځ (۲۰۱۴ کال د فبروري ۳) ليکلي دي، په هغه ۴۷ مخيز راپور کي چي د آلمان له خوا برابر سوی دی او نن یعنی د چهارشنبې په ورځ به د دغه هيواد کابينې ته د پريکړي له پاره وړاندي سي ؛ راغلي دي چي د افغان امنیتي ملیشو تلفات ډېر سوي دي.

دغه راپور چي «د افغانستان پرمختګ» نوميږي، پکښې راغلي دي چي د افغان امنيتي ځواکونو د تلفاتو د ډېرېدو يو عامل دا دی چي له هغه وروسته چي د بهرنيو ځواکونو څخه يې امنيتي مسووليت پر خپله غاړه اخيستی دی، په ټول هيواد کي د جنګ په لومړۍ کرښه کي جنګیږي. په ټوليزه توګه بايد نزدې ۳۵۰۰۰۰ افغان امنيتي ځواکونه د خپل هیواد امنيت ټينګ کړي.

په دغه راپور کي راغلي دي چي پر دې سربيره طالبانو ځيني سيمي هم نيولي دي. «په ۲۰۱۳ کال د طالبانو له خوا د ځينو ځايونو نيول تثبيت سول.» په دې کي د هغو ولايتونو ځيني سيمي هم شاملي دي چي آلماني ځواکونه ځني وتلي دي، لکه کندز او بغلان.

په راپور کي زياته سوې ده چي تر ټولو ډېر بيا د دغه هيواد په ختيځ او په زياته بيا لوېديځ کي چي د طالبانو مرکز بلل کيږي ؛امنيتي وضعيت خراب دی. حتی د دغو سيمو په لويو ښارونو کي طالبان تلاښ کوي چي تر خپل کنترول لاندي يې راولي

د بهرنيو عسکرو تلفات

په راپور کي راغلي دي چي په زغره والو وسايلو سمبال بهرني ځواکونه چي د وسله والو د يرغلونو اصلي هدف هم دي په تلفاتو کي یې نیسبي کمښت راغلی دی. د راپور په حواله دغه شمېره د ۲۰۱۳ کال په لومړيو يوولسو مياشتو کي د تير کال له ۲۸۴تنو څخه ۲۲۵ تنو ته راکښته سوې ده.

په افغانستان کي د بهرنيو ځواکونو جنګي ماموريت د روان کال تر پايه پوري پای ته رسيږي. د آلمان کابينه به دغه راز د چهارشنبې په ورځ د ايساف په چوکاټ کي د آلماني ځواکونو د وروستي ماموريت په اړه پريکړي وکړي.

په پلان کي ده چي تر ۲۰۱۴ کال وروسته هم په افغانستان کي له ۸۰۰۰ څخه تر ۱۲۰۰۰پوري بهرني ځواکونه پاته سي. د دغو ځواکونو دنده به د افغان ملیشو ملاتړ وي.

آلمان هم پتېيلې ده چي په دغه ماموريت کي له ۶۰۰ څخه تر ۸۰۰تنو پوري عسکرو پوري د افغانستان په پلازمېنه او شمالي ولايتونو کي په دندو وګوماري.

  خو دغه ماموريت به هغه مهال رسمي بڼه غوره کړي چي حامد کرزی له واشنګټن سره دوه اړخيز تړون لاسليک کړي((