پرون په فیسبوک کې اوازه وه، چې د کرزي د زوکړې شپږپنځوس کاله پوره شول. پوره باوري يم، چې کرزی به هم پر دې خبره خاندې، چې ځينې لاهم دی په ژوندو کې ګڼي او آن کاليزې يې لمانځي!

کرزی له ننه شاوخوا دوولسه کاله وړاندې دبن دپرېکړې تر چړې لاندې مړشو، هغلته سمدستې نوی وزېږيد، سا يې واخيسته او په غوږو کې يې اذان نه، د (B52)غږونو ازانګې کولې، دخاپوړو و، چې په ارزګان کې يې پر موټرسايکل پښه واړوله، له ده سره يوځای ګران افغانستان ته د سرو تودو وينو توږم راغی. دی بېغمه د افغانانو په ککريو راروان و، ناټووالو ورته پرلپسې افرینونه ورکول او ټلوالې ورته خوله چينګه مسکه نېولې وه.

کرزی په ارګ ننوت، له ارګ اذان منډه واخيسته د چرسو لوګي ترې راپورته شول، سپين کلمه دار بيرغ نسکورشو او د ارګ په دروازه کې په پتلونو کې ربيټونه راشنه شول. دی دننه ناست و.له دغې شېبې وروسته هغه پوره ځان په مړو کې حساب کړ، ځکه چې ديوې امضا لپاره هم باید اجازه واخلي.

کرزي د خپلې مړينې په دوولس کاله کې مهمې ډالۍ ملت ته وړاندې کړي:
د ده په دوره کې د هرډول بې دينۍ لپاره پراخې زمينې برابرې شوې.
دين فردي مسله وګڼل شواو له سپېڅلې خاورې د امر بالمعروف و نهی عن المنکر مهمه فریضه والوتله.
لسګونه ډليز جنسي تېري وشول.
تر دوو کلو په ښکته عمر کې نجونو باندې د دوی د نظامي اشخاصو له لوري جنسي تېري وشول.
د ارګ تر څنګ له لوږې او يخنې نه ماشومانو ساوې ورکړې.
له لوږې ملت زامن خرڅ کړل.
د افغانانو ترمنځ دومره تفرقه اچول، چې د هېواد تجزيه پکې په خوښه ومنل شی (لايې هڅې روانې دي.)
دين، مدرسه، ږيره، او ږده لمن او... لوی جرمونه وګڼل شول.
سلګونه افغان پېغلې په خوښه تر پې آر ټې ګانو پورې تلل.
په کابل کې د نایټ کلبونو پرانېستل.

او...

د کرزي د مړينې په دوولسو کلونو کې هغه جنايات تکرار شول، چې ممکن د افغانستان په معاصر تاريخ کې به له (ګلم جمو) پرته ساری نه لري. ځکه خو زه په پوره ډاډ وايم چې کرزی مړ دی.

هغه له الجزيرې ډېر په مړه خوله داومنله چې زه له افغانستان سره په شوو مرستو په خپل وروستي کال کې لږ لږ خبرېږم، نور نو هر هېواد له خپلو ځواکو له لارې مرستې رالېږي، چې په مصرفولوکې يې موږ هيڅ هم نه شو ورته ویلای.

هغه کلونه وړاندې د کندهار فرهنګيانوته منلې وه، چې زه دګوړې واک هم نه لرم، خو صبر لږ به ورته وګورو کنه په کرز کې به ماهیان نیسو.

د غلامۍ او بلواکۍ بل اعتراف يې عبدالجبار قهرمان په ډاګه کړ، چې کرزې لا آن څلور کاله وړاندې له خپلې بلواکې خپل پلورلی ضمير خبر کړی و.ځکه خو که څوک اوس کرزي ته د شپږپنځوس کلنۍ پر ویاړ مبارکې ورکوي، ډلونه وهي، هغوی دې د ده مرګ د دوولسم تلين په پار اوښکې توی کړي، کرزی د بن په پرېکړه کې ومړ